Hurrengo hilabetean Donostiako Zinemaldia dator, zinemazaleentzako topalekua, are gehiago lurralde honetan bizi garenontzat. Aurtengo edizioan pelikula erakargarria estreinatuko dute “Zinemira” sailean, datorren irailaren 27an.

Mireia Gabilondo bergararrak zuzendu du film luze hau, Karmele Jaio gasteiztarraren izen bereko eleberrian oinarriturik, ezagunak ditugun osagaiak erabiliz eta publiko orokorrari eskainiz: Luisak Alzheimer gaixotasuna dauka, erietxean Nerea alabak zaintzen du eta iraganaldiko kontu batzuk azaleratzen dira. Alabak ospitaletik kanpo ez daukan lasaitasuna bertan nolabait topatzen du. Emakumezko protagonistak, emakumezko idazlea eta zinema zuzendaria. Euskarazko zinema gero eta muga gehiago apurtzen dabil azken urteotan, topikoetatik haratago geure arloko gaiak ukituz ere bai, pozgarria zinez. 

Estreinaldia iritsi bitartean, egin klik hemen trailerra ikusteko.  

Info+: http://sustatu.com/1377262700494

  Medemzalea naiz eta aitortuko dut hasieratik, baina ez dago zalantzarik azken urteotan dokumentalen panorama irauli egin duen lana “Euskal Pilota. Larrua harriaren kontra“ (2003) izan zela. Esparru batzuetan polemika pizteaz gain, beste esparru askotan harrera bikaina eduki zuen eta bideak zabaldu zituen zinematografikoki ere bai.

Honen atzetik oso lan interesgarriak etorri dira, hala nola “Extranjeras” (Helena Taberna, 2002), “Bagdad Rap” (Arturo Cisneros, 2005), “Amerikanuak” (Nacho Reig eta Gorka Bilbao, 2009), “Bertsolari” (Asier Altuna, 2011), “Gazta zati bat” (Jon Maia, 2012), “Zuloak” (Fermin Muguruza, 2012) edo “Barrura begirazteko leihoak” (Josu Martinez, 2012).

Geure lan arloko gaiak jorratuz ere, gauzak mugitu egin dira azken aldiotan. Lehenik “Cuidadores” (Oskar Tejedor, 2010), Gipuzkoan eta Lapurdin errodatutakoa, gaixoen zaintzaileen ikuspuntua, bizipenak eta sentipenak jasotzen ditu. “Cuidadoras” izenburua eduki behar zuen, noski, baina behintzat gizonezko batek erakutsi du horrelako lan bat egiteko sentiberatasuna, Alzheimerrak jotako aitarekin edukitako esperientziatik abiatuta. Gomendagarria. Bigarrena “Alma” da (José Javier Pérez, 2011). Bikaina. Andaluziar batek Bizkaian egindakoa. Alboko Esklerosi Amiotrofikoak jota dagoen Mikel Truebar santurtziarraren bizitzaz, irribarre eder honekin lagunduta. Eta emaztearekin eta, batez ere, alabarekin. Baita bere medikuarekin ere. Julio geurea. Oso gomendagarria.  

Info+: http://eu.wikipedia.org/wiki/Dokumentalak_Euskal_Herrian