Videomed zinemaldi oso berezia da, Medikuntza eta Osasunaren arloak uztartzen dituena Zinemarekin. Orain dela 31 urte abiatu zuten lehenengo aldiz Badajozen, han behean eskuinerantz, Espainia eta Portugal arteko mugan. Extremadurako erakunde publikoek sostengatua da eta nazioarteko izaera dauka, izan ere Latinoamerikarako ere erreferentziazko ekitaldia bada. Urtero herrialde gonbidatua aukeratzen dute, eta aurten esate baterako Kuba da.

Aurten 100 bideo, dokumental edo pelikula aukeratu dituzte lehiaketarako, eta horien artean geure “Aulki Hutsak” egongo dira. Azaroak 21ean proiektatuko dute, astelehena da eta han egongo naiz gure lana aurkezteko. Herrialde askotako jendea egongo da, eta arratsalde hartan konpartituko dugu kartela izenburu hauek dituzten filmekin: “Mi salud, mi derecho”, “El medicamento, un derecho secuestrado”, “Historias para contar” eta “Ars medica”.

Esango dizuet zinemaldi honetako lan ugari teknikei buruzkoak direla, Kirurgiari buruzkoak eta abar. Izan ere teknologia berriei eta telemedikuntzari arreta berezia eskatzen dietela Badajozeko topaketa honetan. Geureak bestelako ukitua dauka, bistan da, ez hain medikoa eta are gutxiago teknikoa, baina eskertzekoa da izaera humanista dauzkaten lanak ere plazaratzea.

Kontatuko dizuet.

Irudi eder hau udazken-negu honetan oraindik ez dugu aukerarik izan ikusteko. Baina inkluso elurrik gabe ere goiko paraje horiek paradisutik oso gertu daude, sinesdunak izan ala ez. Naturaren aldetik soilik, behintzat, hala iruditzen zaigu mendizale askori.

Lehengo egunean iragarri genizuen blog honetatik geure DVDa salgai dagoela Gabon hauetatik aurrera Garoa liburudendetan, Zarautzen eta Donostian (Gros). Asfaltotik mendi aldera egin dugu jauzia eta Arantzazuko frantziskotarren dendan ere eskuragarri dago geure lana. Baita euren webgunearen bidez eskatzeko aukera ere.

Osasuna!

Zarauzko txoko honetan aterpe hartuko dute gure aulki hutsek, baita Groseko liburudendan ere Donostian. Hirugarren edizioaren gastuak berdintzeko salgai ipini ostean, “Garoa”-n DVDa utziko dugu eskuragarri.

Besteak beste, liburudenda beteranoan “Paperezko lagunak” izeneko ekimena antolatzen dute, irakurtaldia eta solasaldia liburu baten inguruan. Baina ezagunena eta arrakastatsuena , musika eta literatura uztartuz, “Paperezko kontzertuak” saioa dute zalantzarik gabe. Horren barruan eta 2016ari ekiteko, luze barik, Audience & Kirmen Uribe egongo dira Europako kultura hiriburuan.

Urte berri on!

There’s a grief that can’t be spoken

There’s  pain goes on and on

Empty chairs and empty tables

Now my friends are dead and gone…

“Empty chairs at empty tables” (Les Miserables).

Ibilbide luze honetan, dokumentalaren lehenengo edizioaren ostean bigarrena argitaratu genuen, zuzenduta eta txukunduta. Duela bi hilabete argitaraldi bien DVD guztiak agortu egin dira, pozteko albistea dena zalantza barik!

Hirugarren edizioa egiteko erabakia hartu dugu, oraindik eskaerak bazeudela ikusirik, baina berritasun batekin. Orain arte dohainik zabaldu ordez, salgai ipini dugu, argitaratze gastuak berdindu ahal izateko. 10 eurotan ipini dugu prezioa eta mugitzen hasi da jada.

Datorren asteburuan hasiko den Durangoko Azokan adibidez Arantzazu Edizio Frantziskotarren postuan egongo da geure “Aulki Hutsak” salgai, 71 zenbakiduna Artekalen. Akordioa lortu dugu eurekin eta oso eskertzekoa da euren aldetik lekutxoa egin izana geuretzat (mila esker Mentxu!).

Oraindik ez dakit zein egunetan egongo naizen bertan postuan, baina polita izango da Azoka barrutik bizitzeko esperientzia. Arantzazuko egutegi famatuaren ohiko erosleak edo Pello Zabalaren zaleak hortik ibiliko dira, eta ea geuk ere geurearekin jakinmina piztuko dugun.

Lagunei, senideei edo nahi duzuenei komentatzeko badakizue non egongo den geure lana. Segi bizkor!

Bere ibilbide publiko naturalak eginda zeukala ematen zuenean, leku txikietako esparru pribatu intimora bilduta zegoelakoan, liburutegitik etxera, eskuz esku bestela…

Maiatzaren amaieran, azken emanaldia sinboliko xamar izan zen, Donostiako Psikologia fakultatean, Lori Thompsonen Matiako taldearekin. Momentu pertsonal korapilatuan iritsi zen, lan esparruan zaila, bikain etorri zitzaidan alde horretatik. Eta orain, uda pasa berritan, zauriak sendatzeko bidean irmo, Izaskun Andonegirekin aspaldiko partez batu naiz. Udazkenari ongi etorria eginez edo, geure bizileku berrian, Zarauzko Tenpluan, Modelo zinema aretoan antolatu zuen Bideginek atzoko. Publiko artean jende mordoa zegoen, eta kontatu didatenez solasaldia 2 orduz luzatu zen.

Udazkenean bete-betean beste bi post-data edukiko ditugu: Bata Donostia Ospitalea eta eskualdeko Lehen Mailako Arretaren eskutik, besteak beste Iñaki Saralegirekin mahai-ingurua konpartituz.

Eta bigarrena urrunago, Nafarroako ipar-ekialdean. Otsagabiako oihartzunek-edo eraginda, Izabako Osasun zentroa eta Erronkariko emakume talde baten eskutik.

Osasuna!

PD.- DVD guztiak agortu zaizkigu. Laster 3. argitalpena martxan ipiniko dugu.